IS 
EN 
Íslenska sjávarútvegs- og fiskeldissýningin IceFish 2024 verður haldin með pomp og prakt hér á landi dagana 18.-20. september. Þetta er í 14. sinn sem sjávarútvegssýningin er haldin hér á landi. Á sýningunni má meðal annars sjá nýjustu tæki, búnað og þjónustu sem sjávarútveginum býðst, allt frá fiskileit, veiði, vinnslu og pökkun, til markaðssetningar og dreifingar fullunnar vöru.
Fyrirtækjastefnumót verður í boði á sýningunni en þau hafa notið vinsælda á undanförnum sýningum og það er von okkar að árangurinn verið áfram góður. Þátttakendur hafa myndað ný og öflug viðskiptatengsl og kannað ný markaðstækifæri. Á síðustu sýningum hafa að meðaltali yfir 90 þátttakendur frá 24 löndum tekið þátt á yfir hundrað fundum.
Enterprise Europe Network stendur fyrir þessum viðburði innan IceFish-sýningarinnar og er þátttakendum að kostnaðarlausu.
Fyrirtækjastefnumótið fer fram fimmtudaginn 19. september í sýningarhöll 1, í Smáranum í Kópavogi. Nauðsynlegt er að skrá sig á viðburðinn. Skráning og frekari upplýsingar eru á ensku á vefsíðu fyrirtækjastefnumótsins: Matchmaking at IceFish 2024
Hvers vegna að taka þátt?
Fyrirtækjastefnumót er einstakt tækifæri til að styrkja tengslanetið þvert á landamæri og kynnast hugsanlegum viðskiptaaðilum. Ávinningur af þátttöku er:
- Aukinn sýnileiki þíns fyrirtækis
- Aukið aðgengi að fjölda fyrirtækja og hagsmunaðilum
- Markvissir og fyrirfram skipulagðir 20 mínútna fundir með hagsmunaaðilum
Fyrir hverja er þjónustan?
Fyrirtækjastefnumótið er sniðið að þörfum fyrirtækja, klasahópa, alþjóðlegra leiðtoga og hagsmunaaðila á sviði rannsókna og nýsköpunar í sjávarútvegi, þar á meðal útgerðum, fiskeldi, fiskvinnslu, markaðssetningu- og dreifingu, sjóflutningum og úthafssiglingum, og fjölmörgum öðrum.
Fyrirtækjastefnumótið er skipulagt af Enterprise Europe Network á Íslandi, starfrækt hjá Rannsóknamiðstöð Íslands-Rannís, í samstarfi við Íslensku sjávarútvegs- og fiskeldissýninguna.
